Nánari lýsing

Íbúðin er á fyrstu hæð með suðursvölum í glænýjum íbúðarkjarna í Lomas de Cabo Roig hverfinu og er mjög vel búin.  3 fallegir garðar eru inná milli húsana með sundlaugum, heitum potti, leiksvæði fyrir börnin, líkamsræktartækjum og hafa gestir aðgang að þeim öllum. Hverfið er mjög rólegt og gott,  veitingastaðir eru í göngufæri og stutt að skreppa á ströndina, á fimmtudagsmarkaðinn, í La Zenia mallið og niður á göngugötuna í Cabo Roig.  Einnig eru margir golfvellir stutt frá hverfinu eins og Campoamor, Villamartin, Las Colinas og Las Ramblas.

Eldhús, stofa og borðstofa

Komið er inn í anddyri með góðum forstofuskáp, falleg stofa sem einnig er borðstofa og opið er inní eldhúsið.  Í stofunni er góður sófi sem einnig er svefnsófi, snjallsjónvarp með erlendum sjónvarpsstöðvum, WiFi, loftkæling og borðstofuborð með sex stólum.  Frá stofunni er gengið út á góðar svalir með borði, fjórum stólum, gasgrilli og flottu útsýni yfir sundlaugargarðinn.
Eldhúsið er bjart og vel búið og þaðan er síðan gengið inní þvottahús/geymslu.  Í eldhúsinu er uppþvottavél, örbylgjuofn, Dolce Gusto kaffivél, brauðrist, hraðsuðuketill og öll helstu áhöld til matargerðar.

Svefnherbergin eru tvö

Íbúðin er með tveimur svefnherbergjum og einnig er svefnsófi í stofunni,  gistipláss er því fyrir 4-6 gesti og einnig er barnaferðarúm með sæng og kodda fyrir 0-2 ára barn.
Hjónherbergið er með hjónarúmi og góðum fataskápum.  Frá hjónaherbergi er hægt að ganga út á svalirnar.  Gestaherbergið er með tveimur einstaklingsrúmum og góðum fataskáp.  Bæði svefnherbergin eru með loftkælingu og nýjum rúmum.  Sængur eru í íbúðinni sem gott er að nota á vorin og haustin.

Baðherbergi

Fallegt baðherbergi með salerni, vaski, sturtu, hárblásara og innréttingu. Baðherberginu er skipt upp með lokuðum rennihurðum svo hægt er að nota sturtu og salerni á sama tíma.
Baðhandklæði fylgja hverri leigu, eitt stórt og eitt lítið fyrir hvern gest.  Gestir eru þó beðnir um að koma með sín eigin handkæði til sólbaða og til að taka með á ströndina.

Svalir

Gengið er út úr stofunni á fallegar svalir sem snúa í suður og með útsýni yfir sundlaugargarðinn.  Þarna er frábær aðstaða fyrir gesti til að borða úti og njóta. Borð með fjórum stólum og gasgrill er á svölunum. Einnig er íbúðin með 2 sólbekki sem hægt er að taka með niður að sundlauginni.

Sundlaugargarðarnir eru þrír

Í sameign Terrazas eru þrír sundlaugargarðar inná milli húsanna í lokuðum og læstum garði sem aðeins gestir hafa aðgang að. Þar eru tvær stórar sundlaugar,  barnalaug, vaðlaug, líkamsræktartæki, leiksvæði fyrir börn og sturtur.  Þarna er frábær aðstaða til að sóla sig og njóta.  Garðarnir eru einstaklega fallegir og mjög fjölskylduvænir.

Aðrar eignir stutt frá

Við erum einnig með fleiri íbúðir í Terrazas kjarnanum til leigu, frábær kostur ef nokkrar fjölskyldur eru að ferðast saman.  Einnig erum við með Einbýlishús og raðhús í ca. 5 mín göngufæri frá Terrazas.